Alcuentros poéticos nel Antiguu Institutu: Humberto Gonzali
Humberto Gonzali
Presenta: Aurora García Rivas
Música: Dani García de la CuestaAXEDREZ
Xugar al axedrez, llueñe,
cola compaña d’una muyer y un perru,
nuna ciudá espantible, estraña.
Perfacer les estratexes y imaxinales
nos bárbaros combates de la tribu.
Arramar el licor sobre les frases
y enfilar d’inviernu la partida.
Tener deprendío peles ventanes
la estadística primordial de la humanidá.
Entainar el pensamientu.
Enquivocar el xaque y morrer.
Entamar otra vuelta. Pidir un vasu.
Acariciar una pierna, esbocexar
y facer conversa sobre’l pasáu inminente.
Querer muncho, quiciás ensin señardá,
ensin ser a sabelo, al semeyu d’un recuerdu.
Centro de Cultura Antiguo Instituto
Descripción
El 19 d'ochobre de 1797, Gaspar Melchor de Xovellanos punxo la primer piedra del Real Institutu Asturianu, fundáu col envís de dar formación científica y téunica nes materies de marina y minería por cuenta la importancia de dambes actividaes n'Asturies.
L'edificiu actual ye resultancia de dos fases constructives. La primera desendolcóse ente 1797 y 1807 y respuende a los diseños de Juan de Villanueva (1739-1811), que proyeutó la planta baxa, d'estilu neoclásicu. La segunda fase correspuende a l’ampliación fecha ente 1887 y 1892 por Ricardo Marcos Bausá, que consistió na elevación de dos plantes sobre la orixinal.
Anguaño agospia'l Centru de Cultura Antiguu Institutu, un espaciu de referencia pa la creación, producción y espardimientu artísticu y cultural de la ciudá.
